كاتم الأحزان على كرسي الاعتراف

اوووووووووووووووه


نيالك يا كتوم كل هادا لالك


نور والله الكرسى



بجد هلا والله

حى الله

بالعـــقــــيـــد كتوم

لى عودة

تشاااو

شو هالمقدمة الرائعة يا عم

اهلين والله بكاتم

اخيــــرا وقعت يا كاتم

بصراحة انا حضرت الاسئلة

بس مش هلقيت هسألك

اول خليك ترد ع البطاقة الشخصية

يـــاهـــلا والله فيك

منـــــور كــرسي الأعتـــراف

بتمنالك جلســه ممتعـــه

هههههههههههههههههههههههههه


انا هالوقت بس عرفت شو معنى المثل اللي بيقول

اللي تخاف منه يطلعلك

هههههههههههههههههههههه

موقفي ضعيف

يا خسارة الرحلة هههههه

اول اشي يسلمو ريان ع الكلمات الجميلة والراقية
التي نسجت من انسان راقي ومميز مثلك
أعجز على الرد على حروف خرجت من انسان مثلك

وبأشكــر جميع الأعضــاء

وأنا بيشرفني إني أكون هنا بين أيديكم

واللي حابب يسأل عن اشي اهلا وسهلا بيه
ولكمـ الحرية في إختيار الأسئلة

وأنا إن شاء الله بأقدر أجاوب عليها

راح أبدأ ببطاقتي الشخصيــة

الاسم : أحمــد

العمر : 22 سنة

الوظيفة : طالب بالجامعة

المزاج : رايق

التخصص : إرشــاد نفســي

الجامعة : جامعة الأقصى

المعدل الجامعي : 73%

الهواية : السباحة والرماية وركوب الخيل ههههه

طموحي : إني أخلص جامعة بمعدل منيح وإني أكون نفسي وأستقر
وأتزوج من بنت تكون بتحبي وتكون مخلصة اللي

وبس خلاص

يلا اتفضلوا اسألوا

بس برضو أنا عند كلامي وكل واحد راح يجيه يومه
ههههههههه لنا عودة

هلا والله بكاتم
هلا بيكِ يا دموع


والله والله منور كرسي الاعتراف
منور بأسئلتك

اخيـــر وقعت يا كاتم
اسم الله عليا هههههه

اول شي كيف احساسك وانت ع كرسي الاعتراف
لسه أول يومـ ومش عارف
بس لما شفت اسألتك مبين انها راح تكون أيام
سودة ههههه

المرة هاد مش راح اسألك كتير وازعجك
ماشي

بس بدى اسألك اكم سؤال كترحيب الك بكرسي الاعتراف
ماشي

ما بدى اطول بالكلام
ماشي كل هالبرم وما بدك تطولي

نبدأ بالاسئلة ....

ههه حلوة الكل بيعرف ..
بدي أحكيلك أنا مش عارف إزا حبيت ولا لااء
يمكن كنت بدي أحب بس ما حصل نصيب
وما صار بينا أي حب وما عشت قصة حب يعني
وباحكي مع اللي كنت بدي أحبها على أساس
صداقة مش أكتر وهي بتعنيلي صديقة وبنت غالية عندي ...

3.. هل انت الآن عايش قصة حب؟؟
لاا ..

4.. معك وردة وحدة وحكولك تعطيها لبنت وحدة من المنتدى
مين هي هالبنت وشو السبب؟؟

فتاة الورود .. السبب / بأعزها كتير

5.. اكم مرة حكيت كلمة بحبك من قلبك؟؟
ولاا مرة ..

6.. اكم رقم بنت بجوالك؟؟
3 ارقام بنات ولا رقم لبنت غريبة

7.. شو اكتر شي بيجذبك لشخصية البنت؟؟ وشو اكتر شي بيستفزك من البنت؟؟
بيعجبني بشخصية البنت أنوثتها وذكاءها وخفة دمها
وطبعا أخلاقها أول اشي وجمالها وصراحتها ..
وبيستفزني فيها عدم الثقة والشك والعنادة والكزب

8.. هل عمرك تلاعبت بمشاعر بنت ؟؟ طيب شو رأيك بالشب اللي بتلاعب بمشاعر البنت ؟؟
الحمد لله عمري ما تلاعبت بمشاعر اي بنت
وما عمري حكيت لبنت بحبك واضحكت عليها
والشباب اللي متل هيك اصلا انا بأنتقدهم دايما
وبأحس إنهم ماإلهم شخصية لو إلهم شخصية كان
بيكون الهم رأي واحد في بنت وحدة هي البنت
اللي بحبها بجد مو كل بنت يشوفها يعمل شخصية جديدة ويروح يحبها ..

9..انت حكيت في اجاباتك بالمنتدى بيوم انك حكيت بحبك بس لبنت وحدة
وبعدين انت حكيت انك ما حبيت فهمني شو سبب هالتناقض اللي بإجاباتك؟؟
أنا كنت بدي أحب واتفقت على إني أحب بس أول
ما جربته لقيت نفسي مش قد الحب ... وما فيها
شي لما حدا يعترف انه مش قد الحب ..
لأنه الظروف مش دايما بتكون بإيد الواحد
وسبب التناقض اللي في إجاباتي : لأنه اللي بده
يحب بحب من قلبه والحب هدا بين قلبين
مش بحب عشان أكتب في المنتدى إني بحب
أو أفتخر قدام الناس إني بحب عادي هدا الحب بيضل
سر بيني وبين الشخص اللي بحبه ..


10.. بدي احيلك اكم اغنية وانت تحكيلي بشو بتذكرك .او شو كانت بتعني الك:
بين الامل والخوف (( اصالة ))
شمس الأصيل
انا لو اذيته (( محمد حماقي ))
برنسيسة المنتدى

11.. لمين بتهدي هاي الاغاني
ملاحظة // ممنوع اهداء الاغاني للشباب
مع إنها مش حلوة أهدي أغاني لبنات
بس يلا بدي أمشيها الك ههههههه

لو قالولك ( هاني شاكر )
الك ولبرنسيسة ولشمس

بعترف قدام عنيك ( عمرو دياب )
ولا لوحدة لأنه كلمات الأغنية شوية صعبة

انا وانت وبس ( اصالة )
ولا لوحدة

12.. مين الانسان اللي بتفديه بروحك ؟؟
والله بأفدي كل انسان باعزه وبأحبه

طيب انت عمرك حكيت لحدا انا بفديك بروحي ؟ ولمين حكيتها ؟؟
ما حكيتها لحدا لأنه ما صار مناسبة إني أحكيها لحدا
بس لو حصل اشي لا سمح الله ممكن احكيها اله

13.. شو اسم ابوك الله يخليه الك؟؟
هدا سؤال خاص ما بأقدر احكيه يعني
اسم ابوك واسم العائلة واسم الام هاد اسألة خاصة
وما فيه لزوم إني أحكيها بمنتدى


واكم اخت واخ الك؟؟؟
اللي اختين .. وأخ واحد وكلهم أكبر مني

14.. ليه انت بتدخن؟؟
لأني عايش بغزة

15.. عمر حدا فهمك غلط ؟؟ طيب شو شعورك لو حدا فهمك غلط؟؟
أه بتحصل كتير معي .. عادي .. اللي بده يفهمني
غلط يفهمني واللي بده يفهمني صح يفهمني
أنا مش مجبر حتى أترجى الناس انها تفهمني صح .

16.. (( مين باعك بيعه )) شو انطباعك عن هالمقولة ؟؟ وهل تتطبقها على نفسك؟؟
أكيد صحيحة .. الإنسان دايما لازم يكون عنده عزة وكبرياء وأنا شخصيا اللي ببيعني ببيعه
بس إزا كان صاحب أو شخص عزيز يمكن يجمعنا القدر أو نحن لبعض ونرجع لبعض ..

17.. (( احنا كده بأرخص ثمن ممكن نبيع ما بنعرفش قيمة حد غير لما يضيع ))
شو رأيك بكلمات هالاغنية
أكتر أغنية بتعجبني في كلماتها هاد الأغنية
حلوة كتير هاد الكلمات لأنه الكلمات هاد واقعية
وصادقة وصحيحة

18.. ليه انت بتحب شخصية النمس اللي في باب الحارة؟؟

لأنه كان بيعطي جو للمسلسل غير الجو اللي كان بالمسلسل يعني المسلسل كان بيدور حول أحداث باب الحارة لكن النمس كان بيعطي جو من المرح للمسلسل
وكمان أبو بدر شخصيته كانت أحلى شخصية في المسلسل لأنه بجد ادى دور كتير حلو رغم انه فضحنا
بس أنا بحكي من ناحية التمثيل ..


19.. وجه نصيحة لكل من:::
ريان
غير اسلوبك مع الناس

ليلة الميلاد
انت متسرع كتير سواء في المشي أو في
تصرفاتك حاول تهدى شوي ههههه
حاول ما تتسرع وتهدى شوي

مصطفى كامل
اسمه مصطفى كامل والكمال لله
بس مصطفى ما شاء الله عليه ما بده نصايح
ياريت كل الشباب زيه خاصة ريان

بنوتة دلوعة
اللي بيثق فيكِ بتثقي فيه
وما تحقدي على حدا ما عمل معك اشي

شمس الاصيل
انتبهي لدراستك اهم من كل اشي
وما تفكري غير بدراستك

الامبراطورة
كبري عقلك شوي وانا ما بعرفك هيك

سندريلا ناعمة
ما اتوقعتها منك باتمنى تغيري رأيك في الكلام
اللي حكتيه في قسم الحوار

قمر 14
ديري بالك على اختك واضربيها لما تغلط

اسيرة الهوى
دايما خلي شخصيتك قوية وما تضعفي قدام اي حدا

لمسات ساحرة
اشربي الدوا في معاده واوعي تشربي الدوا
تبع بابا ههههه

واخيراا دموع الورد
مش غلط انه الانسان يغلط
بس الغلط انه ما يتعلم من غلطته

خلصو الاسئلة اليوم
ما شي يا دموع اتوكلي ع الله

يعني هاد انا ما بعتبرها اسئلة بس عشانك جديد

ما بدي اغلبك كتير

لي عودة

بدى اتركك تجاوب
هيني جاوبت والحمد لله
اسألي متل ما بدك وشو ما بدك
حسابك لما تقعدي ع الكرسي بعدي ان شاء الله
قولي ان شاء الله هههههه


سلااام
سلاام

كاتم الاحزان
مبروك جلوسك على كرسى الاعتراف

-كل انسان وله أمنيات وأمال .. يا ريت تخبرنا عن الحلم اللي يراودك أو بالأحرى
الأمنية اللي تتمناها ؟

شو أصعب المواقف اللي مريت بها ؟

شو موقفك من الحب ؟؟ وهل جربته ؟؟ هل تأمن بوجوده ؟؟

-فأي قرار تتخذه هل .. تحكم عقلك أم قلبك فيه ؟؟ ومن الأسبق فالتحكيم
قلبك أم عقلك ؟؟؟؟؟؟؟؟

هل ندمت فحياتك على شي معيّن ؟؟؟

مالفرق بين الحب والصداقة ؟ وهل يمكن ان يسلكا طرق الغيرة 00؟

_ما رأيك بهذه الكلمات ..
الخيانة ..
المرأه..
الصداقة ..
النميمة ..
النفاق ..

بكفو هدول الاسئلة
ليا عودة
تحياتى ليك

كاتم الاحزان
مبروك جلوسك على كرسى الاعتراف
الله يبارك فيكِ عقبال جلوسك ع الكوشة




-كل انسان وله أمنيات وأمال .. يا ريت تخبرنا عن الحلم اللي يراودك أو بالأحرى
الأمنية اللي تتمناها ؟
ما بحب اتمنى أمنيات طول ما أنا في غزة لأنه صعب تتحقق هاد الامنيات
في ظل هدا الوضع السيئ ..



شو أصعب المواقف اللي مريت بها ؟
كتير مواقف أصعب من بعض
يعني موت أخي كان يوم صعب عليا
ويوم المجزرة اللي ارتكبتها حماس وقتلت العشرات من داخل الموقع اللي كنت فيه
ويوم الانقلاب الأسود ويوم رحيل القائد ياسر عرفات



شو موقفك من الحب ؟؟ وهل جربته ؟؟ هل تأمن بوجوده ؟؟
الحب الحقيقي هو حب البنت لزوجها وحب الزوج لزوجته لأنه مش دايما الحب بيكون
ناجح قبل الزواج بس بعد الزواج بيكون دايما ناجح
أنا كنت بدي أجربه يعني كنت واقف ع الباب لسه هههه بس الحب ما رضي يخليني أدخل
طردني .. وأنا بأمن بوجوده لأنه موجود وفيه ناس بتحب وبأتمنى ربنا يوفقها



-فأي قرار تتخذه هل .. تحكم عقلك أم قلبك فيه ؟؟ ومن الأسبق فالتحكيم
قلبك أم عقلك ؟؟؟؟؟؟؟؟
الأغلب بأحكم عقلي بس أحياناً قلبي بيتحكم في سلوكي
بس الاغلب دائما هو العقل



هل ندمت فحياتك على شي معيّن ؟؟؟
مش فاكر اني اندمت يوم على اشي بس أكيد لأ

مالفرق بين الحب والصداقة ؟ وهل يمكن ان يسلكا طرق الغيرة 00؟
الحب يكون بين قلبين بس الصداقة تكون بين أكتر من شخص
الصداقة قد تتحول إلى حب بس الحب ما بيتحول إلى صداقة
كمان اشي الصداقة هي درجات يعني في اعز الاصدقاء فيه صديق نص نص
وفيه اصدقاء بس اسم بس الحب هو واحد ولا يتجزأ

_ما رأيك بهذه الكلمات ..
الخيانة .. واقع مرير و صفة لأصحاب النذالة والحقارة والقلوب الضعيفة
المرأه.. نصف المجتمع .. وهي الجنس الناعم الذي لا يستغني عنه ادمـ
الصداقة ..هي الإهلاص والتضحية والمساعدة وقت الضيق والشدة
النميمة ..موجودة عند أغلب الناس رغم إنها صفة بشعة
النفاق ..الكذب وتزييف الواقع وموجودة هاي الصفة عند كتير ناس

بكفو هدول الاسئلة
ليا عودة
تحياتى ليك
اهلا وسهلا بيكِ وبتشرفي بأي وقت

تحياتي ليكِ يا قطرة ندى

كل الأسئلة راح أجاوب عليها بس بالليل


لأني بكون رايق

يعني اللي بده يسأل يتفضل يسأل

تحياتي للجميع

بالاول صلي على النبي
اللهم صلي على سيدنا محمد

ورح نبدأ بالاسئله على طووووووووول
ماشي
هادا لسا بدايه
جايبه الك اكم سؤال على الماشي
اوك

س/ماذا تعني لك كلمة أم فى الحياة؟
الأم هي العطاء والحنان والأمان والحضن الدافئ والتي تتحمل كافة الأعباء والهموم
وهي الصديقة الحقيقية التي لا تتخلى عن ابنها ..

س/ هل تؤيد خروج الفتاة مع خطيبها لوحدها بدون كتب الكتاب؟
لا طبعا ما بأيد وما بينفع يخرجوا مع بعض بدون شيئ رسمي متل كتب الكتاب

س/ ما أسم صديقك المقرب لك دائما؟
عبد الله وماجد

س/ ما هو المجهود التي قمت به لنشئت هذه الملتقي حتى اصبح لك مركز فيه؟
ما عملت اشي في الملتقى بس الأعضاء بأعرفهم من زمان عشان هيك علاقتنا قوية مع بعض

س/ من العضو المقرب لك فى الملتقي؟
ليلة الميلاد وريان ومصطفى كامل ودموع الورد وبرنسيسة وطبعا انتي

س/ نريد منك كلمة تقولها لأبيك اليوم؟
أبويا بأشكره على كل شيئ عمله معي ..

س/ ما هو القسم المفضل لك فى الملتقي؟
قسم الحوار والنقاش والقسم الاسلامي

س/ هل مررت بتجربة حب فاشله؟
تقريبا

س/ هل يوجد قصة حب حالية؟
لا

س/ اختر ثلاث كلمات واهديها لمن تحب؟
ما بحب

س/ ما هو الشئ الذي تتمنى ان تفقد الذاكرة كى تنساه؟
ما في شيئ مستاهل أخليني أفقد الذاكر عشانه لو في موقف مش حلو
فيه كتير مواقف حلوة وما بأقدر انساها

س/ما هي طموحاتك فى هذه الحياة ؟
الراحة والحرية والإستقرار وإني أخلص تعليمي

س/ متى تشعر بالوحده؟
لما أفقد الثقة من أقرب الناس اللي

س/ من الانسان الذي تريد شكره وبصدق بحياتك لتعطيه حقه؟
كل أهلي

وشو رأيك في هذي العبارات ؟

( ليس من المخجل ان نسقط المخجل ان لا نستطيع النهوض ) :
أكيد العبارة صحيحة كل انسان ممكن يفشل في اشي والفشل مش غلط بس
اللي بيستمر في الفشل هدا الغلط لأنه الفشل دائما يؤدي الى النجاح

( من جن بالحب فهو عاقل و من جن بغيره فهو مجنون ) :
أحلى شي بالحب أن يصل إلى مرحلة الجنون
وإزا ما وصل يمكن يكون مجنون هههههه

( إن الله جميل يحب الجمال ) :
أكيد الجمال حلو كتير سواء الجمال والاهتمام الخارجي أو جمال الأخلاق
وجمال القلب لازم يكون الإنسان جميل بكل شيئ بأخلاقه وبإيمانه وبكلامه وبزوقه

مـــا الشـــيء الــذي يغضبــــك كتير؟؟
الإستفزاز

- طمــــوحــــك للمستئبــــل؟
جاوبتك عليه قبل

- غلطــــة إرتكبتها وندمـــت عليهــــا؟
ما في

صفــه تتمناها تكون فيك ؟
مش عارف بصراحة

صفــه فيك تتمني تتخلص منها ؟
العصبية أحياناً

كيف تعرفت على المنتدى ؟
عن طريق المدير

شو حسيت اول ما سجلت فالمنتدى ؟
احساس عادي أنما سجلت من قبل ما يفتح المنتدى هههههه
اممممممممممم

ما هي نقطة ضعفك ؟
الحب

خبرنا عن موقف جميل وحلو صارلك
والله كتير مواقف حلوة ومش فاكر موقف معين
إزا اتزكرت بارجع باجاوبك

خبرنا عن يوم حزين وكئيب كان في حياتك كلها ؟؟
يوم وفاة أخي ويوم وفاة أبو عمار

أغنية تحب تهديها لشخص غالي عليك (شخص واحد فقط )
ألبوم كاظم الساهر الجديد باهديه لريان

باقة ورد حمراء لمن تهديها (لشخص فقط)
لليلة الميلاد

ما رايك بالفتاه الذي تأتي وتصارحك بحبها
وما موقفك ؟
بنت جريئة وموقفي بيتحدد حسب البنت ..

لمــــــن تكتب خواطرك واشعارك
لنفسي

انسان شديد الاعجاب به
محمد دحلان أبو فادي شخصية فهمانة
وسميح المدهون ربنا يرحمه شخصية جريئة

انسان أحببته دون معرفة السبب
مش عارف

شخصية تكبر بنظرك كل يوم ؟
ما في

شخصية حبوبة جداً :
شيري ودموع الورد

شخصية ذو ثقة كبيرة بنفسها :
ليلة الميلاد وكل الاعضاء

شخصية محترمة جدا :
كل الاعضاء ومعظم النناس وريان ومصطفى كامل

شخصية مغرورة :
لا يوجد

شخصية منتقده :
لا يوجد

شخصية بارزه :
دموع الورد قمر 14

شخصية كريمة:
شمس الأصيل وبرنسيسة

شخصية ضعيفـة :
؟؟؟

شو رأيك بالاعضاء

ريان / صاحبي وحبيبي وطيب جدا وباحترمه وبأعزه كتير
ليله الميلاد / صاحبي وحبيبي وطيب جدا وبأحترمه وبأعزه كتير
دموع الورد /بأحترمها كتير لأنها طيبة وبتحب تساعد غيرها وبأعزها كتير
فتاه الورد / شخصية حبوبة وفهمانة ولزيزة ودمها خفيف وبأعزها كتير
قطرة ندى / انسانة طيبة ومحترمة جدا بأحترمها وبأعزها كتير
سندريلا ناعمة / انسانة طيبة ودلوعة ومحترمة وحبوبة ربنا يوفقها
بسمة فرح / انسانة خفيفة دم ومحترمة جدا ونشيطة ودايما منورة المنتدى
شيري / انسانة لزيزة ودمها خفيف وطيبة كتير وعاملة جو حلو كتير بالمنتدى
وأخيرا
شو رأيك بشمس الاصيل
انسانة طيبة ومحترمة وأخلاقها عالية وكتير بأعزها وبأحترمها
وبأنتقدها لأنها دايما زهقانة وزعلانة حالها
وهاد صفة مش حلوة في الانسان

شمس الاصيل
تسلمي ع الاسئلة الحلوة
واهلا وسهلا بيكِ بأي وقت

مرحبا كاتم
أهلين برنسيسة


بشوفك قاعد ومرتاح
اوووه كمان كرسي من ورد
نيالك والله
تعالي اقعدي مكاني وأنا موافق

طيب سيبنا من الكرسي وجاوبني على هاي الاسئلة
ماشي

ولعلمك هاي الاسئلة مش كوبي بست هاي من عقلي
ماشي

وكمان بدي تجاوبني بصراحة وتسيبك من دبلوميستك
يا ستي أنا واحد كزاب ومش صريح
مش عاجبك ما تسأليني

نبلش
1. ما هي الاحزان التي يكتمها كاتم الاحزان ؟ وما هي أفراحه؟
والله اسمي كاتم الاحزان مش فاضح الأحزان عشان أحكيها هنا في منتدى
وما بحب احكي أحزاني قدام حدا
وبالنسبة لأفراحي الحمد لله كتيرة وإزا كانت الدنيا مش حلوة بيكفي انه فيها ناس حلوة

2. لكل انسان احلامه الي بيسعى لتحقيقها وبرضو النا احلامنا المستحيلة
شو أحلامك الي بدك تحققها وأحلامك المستحيلة؟
اللي بدي أحققها .. اني اخلص جامعتي واستقر ان شاء الله
والاحلام المستحيلة في نظري إني اسافر

3. احكيلنا موقف مضحك ومحزن ومحرج صار معك؟
موقف مضحك جاوبت عليه
موقف محزن حكيته برضو
موقف محرج / مرة كنت قاعد في صلاة الجمعة والخطيب بيخطب عن يوم القيامة
وعن الجنة وعن النار ويوم الحساب المهم في نص الخطبة جوالي بيرن وكانت نغمة جوالي
اغنية تامر حسني وصار الجوال يغني حبيبي النهاردة لازم تعرف حبك عاملي جنان
يومها التخمت وما عرفت كيف اسكر الجوال ووجهي صار احمر وكل الناس صارت تطلع فيا

4. معك 5 بطاقات نصائح اختار 5 أعضاء واعطيهم هاي النصائح؟
ما بحب أنصح حدا لأنه النصيحة بنزعل منها الايام هاد
و ازا نصحت عضو مش راح يتحملها مني زي ما صار قبل

5. العالم الآن يستمع الى أحمد الانسان فماذا تقول؟
لازم نحس في بعض وقلوبنا تكون مع بعض ولازم نحب بعض
بدون اقتتال وبدون حروب وبدون ضرر لو كلنا حبينا بعض راح نعيش بسعادة وأمان

6. ممكن تفكر لو للحظة تدمر حياة انسان لسبب بسيط انك بتكرهو
لاا .. ما بأفكر إني أدمر حياة أنسان

7. شو شعورك لو عرفت انك سبب فراق اتنين بحبوا بعض؟
انا لو اتنين بحبوا بعض ما بحكي معهم إلا إزا كنت بدي أصلح بينهم
وكل انسان حر في الشخص اللي بحبه وبأتمنى الخير لكل اتنين بيحبوا بعض

8. لو اجبروك اهلك على الزواج من بنت لا تحبها بتوافق ولا لا؟
لا ما باوافق وأنا ما بحب حدا يجبرني على شيئ

9. شو السبب الي يخليك تغير فكرتك عن اي انسان
لما اشوف الانسان نفسه اتغير ..

10 . ماذا تعني لك هذه الكلمات:
الحب / احساس وشوق وسعادة إزا كان صادقاً ونار وتعاسة ازا كان غير صادق
الاطفال / البراءة وزينة الحياة الدنيا
المرأة / حكيت عنها
البحر / العطاء والرزق والراحة والصديق والهدوء
القمر / السهر والرومانسية والهدوء
الليل / الراحة والسكون والتفكير
الوحدة / بألجأ إليها لما اكون بدي ارتاح او بدي أفكر بشيئ
الصداقة / التضحية في وقت الشدة
النفاق / حكيت عنه
فلسطين / هي أمي وأرضي ووطني وكرامتي

11. لو يوم بنت كاتم الاحزان بيكرها اتصلت عليه تطلب مساعدته بتساعدها؟
إزا قدرت أساعدها بأساعدها بس إزا كانت البنت ما بتستاهل المساعدة ما بأساعدها

12. طيب يا كاتم انت مرة بطلت عن السجاير بس ما في فترة قصيرة رجعتلو
ممكن تحكيلنا السبب الي خلاك ما تستغنى عنه وما تحط الحق على غزة خليك بحالك؟
لأني لما بطلته حسيت اشي ناقصني وزهقت كتير ما عرفت أقعد في البيت
السجارة انا بتسليني كتير ..

13. لو صار ويوم تزوج لولو او ريان الي هما اعز اصحابك ببنت ما بطيق تسمع اسمها
شو بتعمل ؟
وشو دخلني مين بدهم يتزوجوا سواء بعرفها او ما بعرفها هدا ما بهمني
ليلة وريان اصحابي والزوجة ما بتأثر على علاقتنا مع بعض وكل شخص حر في اختياره

14. انا ملاحظة من خلال معرفتي فيك تناقض بشخصيتك وكتير باين هاد التناقض بردودك بالمنتدى.. فهمني هاد التناقض
وجهة نظرك ما بقدر أتدخل فيها وكل انسانه الها وجهة نظر احكيلي
في ايش متناقض عشان أجاوبك

15. لو في بنت بتحبك بس انت ما بتحبها وبتعتبرها متل اختك شو بتعمل معها
راح تمشيها معها زي اي شب وبصراحة؟
لا ما بأمشيها معي

16. لمن يقول كاتم الاحزان :
مش ئادر أنساك : ولا لحدا
انت حياتي : ولا لحدا
اشتقتلك : ولا لحدا
حياتي الك : ولا لحدا
خليك معايا : ولا لحدا
بدعيلك تنساني : ولا لحدا

17. كتوم انت مرة حكيت بالمنتدى انو احلا عيد ميلاد الك عيد ميلادك السنة هاي
طيب ليه وبصراحة يا كتوم ؟
يعني كان ضحك ومسخرة وعملته انا واصحابي وكان الجو حلو

18. كاتم الاحزان... بحياتك انجرحت من بنت؟
أه .. انجرحت

19. كاتم الاحزان يا حرام بأزمة مالية ومجبور يتداين فلوس من بنت غير فتاة الورد من المنتدى؟
لو الأزمة المالية هاد بدها تكلفني حياتي ما باروح لبنت أتداين منها

20. وجه نقد للأعضاء :
لولو : وجهت اله قبل هيك
ريان : حكيت بس بدي افسر كلامي اللي حكيته قبل حتى ما يزعل
انا حكيت غير اسلوبك مع الناس وكنت باقصد انه انت مع الناس طيب زيادة عن اللزوم
والطيبة هاد مش دايما بتكون كويسة لانه فيه ناس ما بتستاهل الطيبة هاد انا بحكي عن الواقع
دموع الورد : وجهت الها
حارسة الذكريات :لا يوجد نقد
همسة دلع : لا يوجد نقد
شمس الاصيل : وجهت الها
قمر14 : وجهت الها
سندريلا ناعمة : وجهت الها
روعة الاحساس : لا يوجد نقد
الامبرا طورة : وجهت الها

21. في شب معنا بالمنتدى اسمه كاتم الاحزان
احكيلنا عنه شوي وياريت تحكي عن سلبياته
ووجه اله نقد؟
انسان كلامه دبلوماسي ومش صريح انسان كزاب
سلبياته الكزب وعدم الصراحة
ونقدي اله انه يكون صريح وما يجاوب بدبلوماسية

22. شو ردت فعلك اول ما قعدت على الكرسي؟ وليه كنت خايف تقعد عليه؟
عادي ما كنت خايف بس لأنه الموضوع كان تحدي والشاطر اللي ما يقعد ع الكرسي
والموضوع مش موضوع خوف ومش انا اللي بأخاف

23. احكيلي رأيك في برنسيسة المنتدى وليه حكيتلي ما تحقدي على الناس
مين الناس اللي بحقد عليهم مش فهماك ؟ واي شي حابب تحكيلي اياه احكيه وما في زعل ؟
إنسانة طيبة وإنسانة نا جحة بحياتها استمري في نجاحك
وباتوقع الك مستقبل مشرق .. لا إنتي ما بتحقدي على حدا
انتي ملاك

24. كيف الاسئلة وامانة شو بتحكي ببالك هلقيت ؟
من اجوبتي بتعرفي ردي على اسئلتك

تيب شو الي مخليك مش صريح بإجاباتك ؟
شو بتتوقعي من انسان كزاب .. اكيد ما عنده صراحة

بكفيك هيك اليوم لأني مش فاضية
ولسه كرسي الاعتراف بأوله ما تخاف
تشاو يا ابو اصالة
سلام

اهلا اهلا كاتم
اهلا بيكِ


انا مش عارفه ليه فرحانه فيك ههههه
هههههه عقبال ما نفرح وانتي قاعدة مكاني يارب ..

على العموم انت اكيد منوور
تسلمي النور نورك

======== نبدا ========
بسم الله

ايه شعوررك وكل المنتدى عامل يقولك كاتم ..كاتم ..كاتم ؟؟
عادي أنا اللي اخترت الاسم واتعودت عليه .. ما بدايق عادي

اصحابك زى ويان وليله الميلاد بيقولوك يا كاتم وانتوا خارجين مع بعض او فى الجامعه ؟؟
لا احنا خارج المنتدى بنادي بعض باسمائنا انا بينادوني احمد وانا بأناديهم بأسمائهم
بس هنا بنادي بعض ليلة وريان ههههه بس أحيانا في الشارع بناديه ليلة هههههه

انت بتقول انك بتشرب سجاير علشان انت فى غزه وتستحمل العيشه والكلام اللى مش مقنع ده ..
هل كل شباب غزه بيدخنوا ؟؟ وان كان لا امال فى غزه ازاى ؟؟
التدخين تسلية وأنا بأحسه إنه بخفف عني يعني إحنا في غزة وانتي عارفه حياتنا
كلها مشاكل وكلها ملل شو بتتوقعي مننا نعمل يعني إزا كانوا اللي خارج غزة بيدخنوا
شو بتتوقعي من اللي عايشين بغزة وكمان التدخين بأقدر أتركه بأي وقت بس لما تيجي
الفرصة المناسبة ان شاء الله راح أتركه ...

لما توجهك مشكله تفضل انك تواجه لوحدك ولا نقولها لاصحابك ولا تتهرب منها من الاصل ؟
بأحب أواجها بنفسي ما بحب أحكي لحدا بس إزا كانت بتتطلب إني أحكي لحدا
راح أحكي لاصحابي المقربين اللي حتى يساعدوني بس ما عمري اتهربت من مشلكة حصلت معي

ايه رايك بشخصيتك ؟؟
الحمد لله عجباني كتير ولو أنا ليس أنا لتمنيت أن أكون أنا هههههه

ايه الحاجات اللى مش عاجبك فى نفسك وفى حياتك ؟؟
في نفسي : مش عارف ما في شي مش عاجبني هههه
في حياتي كتير حاجات مش عجباني وأول شي الحصار وما في حرية
ولا في سفر ولا في شي وما بنحس انه عايشين متل الناس

ايه اجمل حاجه حصلت ليك فى حياتك؟
اني اتعرفت على ناس حلوة في المنتدى متلك ومتل احلى اعضاء
واني قدرت اني أدرس جامعة
واني اتوظفت

ايه أجمل شئ اتمنيته واتحقق وايه اللى اتمنيته ولسه ماتحققش؟
تمنيت الوظيفة وتمنيت اني اخلص جامعة والحمد لله تحققوا
والجامعة اخر فصل هدا وبأخلص
بس تمنيت السفر لسه ما اتحقق
ايه اكتر شئ بتخاف منه؟
المستقبل والزواج

ايه احسن حاجه حصلت ليكى اليومين دول؟؟
ترخيص المواصلات على الجامعة حاجة حلوة

ايه هيا اكتر حاجه بتحبها ؟؟
الفرحة والفرخة ههههه

ايه هيا اكتر حاجه ممكن تضايقك؟؟
الاستفزاز ( الرخامة )

ايه هيا اكتر حاجه بتفرحك؟؟
الأخبار الحلوة ولما يكون فيه فرح لشخص عزيز على قلبي

ايه رايك بالحياه ؟؟
الحياة مش حلوة بس بنحاول نصنع منها حياة حلوة
والحمد لله على كل اشي ولو عرفنا معاناة اللي عايشين
بالعراق وبالصومال وبجنوب افريقيا لأحببنا غزة
وشعرنا انها جنة بالنسبة لبعض الدول

مين هو اكتر واحد انتا زعلان منه الايام دي؟؟
مش زعلان من حدا

لو الزمن رجع بيك تحب يرجع بيك لفين وليه؟
هههه ولا سنة الماضي متل الحاضر وحياتنا ما اتغيرت

ايه اكتر حاجه شغله تفكيرك؟
مرحلة ما بعد الجامعة والمستقبل بشكل عام شاغل تفكيري
انا باحب أفكر بالمستقبل

اما بتقعد مع نفسك وتسرح بتتمنى ساعتها ايه؟
بأتمنى إنه تتغير حياتنا إلى الأفضل وبأتمنى أسافر وأعيش أنا واصحابي
في دولة تانية لفترة قصيرة ونرجع تاني ..

صفات البنت اللى لو شفتها فى الشارع او وانت ماشى مثلا
تقول يارب يكون لى ابنه زيها من حيث
طريقه مشيها وكلامها ؟
تكون محترمة وجميلة وكلامها يكون زوق مع الناس وبتعرف تتعامل مع الناس بلباقة
وتكون مطيعة لمن أكبر منها ويكون دمها خفيف يعني بنت عسل ههههه

نفس السؤال بس كزوجه؟
تقريبا نفس الصفات اللي حكيتها تكون طيبة ومحترمة وبتحبني ورومانسية وجميلة
وبتحب النظافة والاهتمام بكل شيئ ومطيعة وبتعرف ربنا وفيها صفة الأنوثة

نفس السؤال بس يكون ابنك؟
يكون محترم وابن ناس هههههه ويكون بيعرف ربنا وشاطر بالمدرسة وذكي
ومحترم مع الناس وكل الناس تحبه

نفس السؤال وتتمنى انك تكون زى الشخص ده؟
الشاب المثقف اللي بيعرف ربنا اللي ما بيدخن الشاب الذكي والزوق
واللي كل الناس بتحبه واللي بحب يخدم الناس والشاب الرومانسي
والطيب وكتير صفات حلوة بالشباب ههههه

شيري اسئلتك حلوة جدا
نورتي بحضورك وبأسئلتك
تحياتي ليكِ

منور ههههههه
النور نورك يا عسل


بدي اسألك اسألة وتجاوب عليها إذا ممكن
اوك تفضلي :

السؤال الأول :
ما هو رأيك بالحياة اللي عايشينها ؟ وماذا نفعل لمواجهة الملل الذي نعيشه ؟
الحياة مش حلوة بس إحنا لازم نكون حلوين ولازم نصنع حياتنا متل ما بنحب
نواجه الملل بالأمل والإبتسامة والتفكير دائما بالأجمل
يعني ما نطلع على الأحسن منا لازم نطلع على اللي أقل منا ونقول دايما الحمد لله أحنا
احسن من غيرنا .

السؤال الثاني :
لو خيروك بين وظيفة حلوة ومرتب عالي في الخارج بعيد عن أهلك وأصحابك
أم البقاء بجانب اهلك بدون وظيفة ايه راح تختار ؟
بأختار إني اسافر الى الخارج بس ما بأقدر أستغني عن أهلي واصحابي
بس يعني بأحاول أزورهم كل فترة أحسن ما أعيش حياتي من دون وظيفة ومن دون عمل
لأنه من دون وظيف ما في مستقبل ولا زواج ولا في اشي ليه أعيش هنا هههه

السؤال الثالث :
كيف الجامعة معك ؟ وكيف دراستك ؟
الحمد لله الجامعة حلوة .. بس لسه ما جبت ولا كتاب وما فتحت ولا كتاب
عقبالك ما تصيري بالجامعة

السؤال الرابع ؟
هل كاتم الأحزان قبل الجامعة هو نفسه الأن ؟ أم الجامعة غيرت من كاتم الأحزان ؟
الجامعة غيرت كتير وخاصة تخصصي غيرني كتير
كنت زمان مشاكلي كتيرة بس بعد الجامعة خفت كتير عن أول الحمد لله
وأكيد اكتسبت كتير معلومات من الجامعة واستفدت في مجال الحياة
والواقع ...

السؤال الخامس :
لماذا اخترت تخصص الإرشاد النفسي ؟ وهل ندمت على اختياره ؟
انا كان ابن عمي وشاب صاحبي بيدرسوه بعد ما خلصت توجيهي
سألتهم عن التخصص وعن محتوى هدا التخصص فحكولي عنه وعجبني كتير
وحبيته ودخلته وما ندمت اني دخلته بالعكس اكتر تخصص عاجبني هو تخصص الارشاد النفسي
لانه علم النفس مهم كتير بحياتنا سواء للشاب أو البنت وما حدا بيعرف
قيمة علم النفس وأهميته غير اللي بيدرس هدا العلم

فتاة الورود
بأتشكرك على حضورك
وعلى اسئلتك اللزيزة
ياريت كل الاسئلة زي تبعتك هههههه
يعطيك العافية
الله يعافيكِ

بتشكرك كتير يا كاتم ع الاجابات الصريحة

بصراحة اليوم كنت ناوية اسألك اكم سؤال

بس شكلك كنت تدعي ع النت عندي طول اليوم فاصل

عشان هيك خلي الاسئلة لبكرا

وانا شايفة الاعضاء قايمين بالواجب

لي عودة